文章分類: 往日的阿Bo (老人家一名，十五歲啦！)

又搵到舊相啦！

bread2007 — Mon, 30 Apr 2007 14:14:14 +0800

噚日又係櫃度搵到阿Bo嘅陳年相，但係就考究唔到幾時影因為係即影即有嘅相嚟架，佢以前有兩張床架！

阿Bo後生嘅時候成日都會跳上床瞓架，你叫佢落返地佢會唔高興架，直到大約五年前佢就開始冇跳啦！相信當時佢個背脊開始有事～～所以而家影嘅相全部都係企喺地下囉！！<

運貨定運狗？

bread2007 — Thu, 29 Mar 2007 22:31:14 +0800

呢個箱係好耐之前運阿Bo去街用嘅，佢當時應該等去街所以好乖企定定俾人影相。

究竟佢係咩品種呢？

bread2007 — Fri, 23 Mar 2007 18:00:22 +0800

究竟阿Bo係咩品種呢？我地都唔知呀！佢五個月大時佢嘅主人唔要佢由阿哥帶佢返嚟，只知佢係由長洲出嚟，不過佢一定係混種獸醫喺佢嘅資料上面就寫佢係史納沙Cross，其實都似架，不如大家一齊研究吓啦！阿Bo 對耳又唔會豎起，ｄ手腳又咁鬼長又高，個咀又長，如果好耐唔剪毛就會似古代牧羊喎，究竟似咩呢？

第一隻狗Billy

bread2007 — Tue, 20 Mar 2007 12:41:04 +0800

呢隻就係我屋企第一隻狗Billy，佢係唐狗，超乖架，以前細個成日同佢玩架，後來老死了～唔記得幾多歲。Billy 同阿Bo唔同，以前佢成日有機會出去郊外玩，差不多每個月都出去一次架！Billy細個原本係住係工廠，但係俾人用熱水淋，好似唔知老豆定話一個親戚帶佢返嚟養架，除咗Billy我地仲養咗隻貓叫“天生”，應該係舅父改嘅。

Billy 同阿Bo個樣完全唔同，但係都一樣受親戚朋友痛錫！

～05年病樣～

bread2007 — Wed, 14 Mar 2007 17:56:34 +0800

阿Bo呢張相攝於０５年１月，記得果時佢成日瞓覺，有時又會震，而０３年尾開始脊骨有問題，睇過麥醫生，當時都未有MRI所以冇得醫，到０４年尾，我地仲以為佢老怕凍同脊骨痛就會係咁，原來係病，所以喺０５年４月就做咗手術囉！呢個就係阿Bo嘅病樣，冇精神，好慘～～

２００４年４月鹿頸燒烤！

bread2007 — Tue, 13 Mar 2007 12:27:21 +0800

當年阿Bo十二歲，係佢第一次去咁遠，去咗鹿頸燒烤呀！所以佢好緊張（大家見到佢成日伸條豬利出嚟），唔敢離開佢自己個地盤半步，冇鬼用嘅，佢果時係未做乳癌手術同未脫牙架！

唔似狗！

bread2007 — Fri, 09 Mar 2007 21:18:57 +0800

以前每次剪完毛屋企人都話佢唔似狗，因為阿Bo嘅毛又黑又密，成隻黑草羊咁呀！

扮有藝術氣質的小狗！

bread2007 — Thu, 08 Mar 2007 21:11:14 +0800

呢張應該係三歲影嘅，冇記錯就係九四年喇！家陣做唔到呢ｄ高難度動作啦！都有幾分似演奏家喎！

呢張係六歲影嘅，九八年影架，九年前幾精靈，換咗個琴就同佢影返張相囉！

九七年滿口都係牙呀！！而家就～～

bread2007 — Wed, 07 Mar 2007 22:16:47 +0800

幾張都係阿Bo五歲時影嘅相，ｄ牙好白好齊呀！

而呢件雨衣係我去夏威夷旅行時買返嚟架！但係一次都未用過，一同佢著咗佢就死都唔肯行，出到街一樣唔行，雨衣無用武之地！！仲買咗成二百幾蚊呀！！今時今日佢有一件紅色嘅，就好鐘意喎，都唔知點解，可能佢要用返本地貨~

相信係阿Bo第一張相！

bread2007 — Tue, 06 Mar 2007 20:45:19 +0800

呢三張相應該係阿Bo大約一歲時影嘅！個時都未搬屋架，喺舊屋影架！當時應該係一九九三年，第三張相個年份係錯嘅，八七年阿Bo都未出世！但係係當時ｄ毛就冇而家咁濃密喇！