老人家星期日覆完診有好消息話有兩隻眼藥水可以停，但係停咗之後佢對眼又紅番（仲好紅潻喎），咁所以今日決定又打電話去問吓周醫生點算好，好在今日周醫生當值好快就覆電話，周醫生話要滴返有類固醇嘅眼藥水囉！冇辦法啦，而家先試隔日滴先睇睇得唔得啦，都唔得就要日日滴喇！！

今日一早約咗周醫生覆診，兩個月冇坐車阿Bo知道有得坐車都唔慌有好野啦！！就係要去太平道俾周醫生睇對老眼囉！所以佢全程都好緊張！之前都提過佢每次坐車都極度緊張好驚佢又整傷個背脊，好在今次冇事！

由家中其中一老加埋我（阿四）帶阿Bo去到診所，明明約咗係第一個但係都要等同埋之前又有多一個病人入咗去，真奇怪～～不過今次等咗半個鐘就有得睇喇，都算快喇！周醫生就話好滿意阿Bo對眼，所以有兩隻眼藥水可以試吓停用，每日就只滴兩次Trusopt，咁阿四就易做好多啦！但係就要好小心留意佢對老眼停咗兩隻藥水之後有冇特別問題，有就要即刻返去睇喇！周醫生話三個月之後先再見喎咁即係阿Bo對眼都好穩定啦！當然阿Bo 今次都係好唔合作啦，最後都要我出夾實佢先肯俾周醫生檢查，真失禮！！

 喺診所其間出現一段小插曲，原本阿Bo今次去到診所好奇怪地都唔驚架，但係當一個男人帶著一個袋入嚟話要做善終服務而又企咗喺阿Bo身邊，阿Bo隔咗一陣之後就突然好以好緊張咁不斷四圍行，總之突然間好似好驚咁囉，所以我就同佢行開去另一邊等囉～～唔知阿Bo係唔係知道個袋入面有隻先遊咗嘅動物呢？

睇完醫生返到屋企嘅例排菜～～瞓到隻豬咁！！

今朝一早陽光普照，熱到好似個蒸籠咁，不過阿Bo都要照樣出街因為約咗周醫生覆診～九點幾出發落到街我同阿Bo熱到溶，阿Bo仲慘ｄ毛咁深色不斷喺度吸熱，氣都透唔到！上咗車有冷氣就好ｄ喇，不過佢知道自己要去睇醫生所以都好驚，好緊張！

今次唔係等咗周醫生好耐就有得睇啦，入到去周醫生就話咁快又一個月嗱！檢查完周醫生話阿Bo對眼都幾好，算幾穩定所以唔使老人家成日走嚟走去之後兩個月先去覆診一次喎！

不過返到屋企就俾阿Bo嚇屎，佢一入門口就一支箭咁入咗房好耐都冇出嚟水又唔肯飲，以為佢又唔知整親條腰定中暑潻呀，上面幾張相就係佢當時個樣，一味張大個口透氣又好似頭暈咁中吓中吓，坐又坐唔穩，後來我就用針筒俾ｄ冰水佢飲，跟住就再開個冷氣俾佢係房瞓覺！

到咗下晝已經好好多喇！今朝應該因為太熱同太攰而搞到佢頭暈眼花！夜晚就冇晒事囉，不過都好攰所以好早瞓咗啦！

點樣知道老人家係唔係腳軟，就係睇吓佢有冇八字腳就知喇！每當佢八字腳咁嘅樣就係因為佢對腳仔冇力企唔穩向外跣，就好似呢張相咁囉！

阿Bo今晚只咳了一次，真好喇，而家已經瞓咗啦，仲有兩次抗生素未食好在Blog友靚靚豬提我要俾佢食晒ｄ抗生素咋，唔係我都記抗生素係要食晒為止架！！咳就少咗啦，但係阿Bo透氣仲係好速好似好熱咁，但係屋企已經開咗冷氣架喇，都唔知點解會咁，又唔知係唔係ｄ藥影響，所以再要過多一兩日先知要唔要再睇醫生～～

就係因為阿Bo成日都要張大個口透氣，所以今晚張張相都係見牙唔見眼囉！仲見到佢ｄ爛牙潻呀！

唯一見到眼呢張就見到對眼仔啦！

今晚終於返咗香港啦！星期二晚上機之前都打電話俾媽咪問咗阿Bo睇醫生嘅情況，Dr. Sam 就話阿Bo可能係細菌感染令佢咳（呢個情況係最簡單嘅），而醫生當日聽佢個心同肺就聽唔到有特別，所以就先食五日抗生素，之後冇事就唔使返去覆診，如果唔係就要返去照肺！原來Dr. Sam 都係一個好有經驗嘅獸醫嚟架，媽咪話佢睇咗阿Bo成二十分鐘呀！！連助手哥哥Kelvin 都記得阿Bo，因為呢半年都經常返去診所睇醫生～～個個都話冇咩事就最好唔好搞老人家啦（e.g. 照X光）！仲有原來周醫生將阿Bo對眼嘅情況及所用嘅藥水都報告返去俾Dr. Tiger 知，佢真係好好。但係睇背脊就冇喎，可能呂醫生太忙啦，當日我將阿Bo而家食嘅骨藥同眼藥水名抄晒俾媽咪帶去俾Dr. Sam 睇，Dr. Sam 話電腦有資料，因為周醫生有報告阿Bo嘅情況返大圍診所囉！

講返老人家嘅情況，佢已經咳少咗好多啦，但係媽咪話佢間唔中先咳一次，一日只咳一兩次，之前係一個鐘頭咳一兩次，所以情況好咗好多，今晚都咁見佢咳個，希望佢食完個抗生素療程之後冇事啦！

阿Bo咳咗幾日都唔見佢好，今日仲好似嚴重咗透氣好急速，所以阿媽話都係今日放咗工帶阿Bo去大圍睇吓好ｄ喇！我今晚會去新加坡所以同唔到佢去睇，要到星期五先返，都有ｄ擔心希望阿媽搞得掂佢啦！今晚只有兩位新嘅醫生睇，約咗Dr. Sam7:00pm，希望阿Bo冇特別問題啦～～

今日又係每月覆診嘅大日子啦，今朝都仲有雨落，好在約咗下午睇而出發時又有太陽真係好喇！阿Bo都知道要去見周醫生架啦，所以都好緊張！不過佢今日精神都幾好，要去咁遠都唔怕。

之前都知道有一個網上朋友仔小me今日同一時間都會去周醫生度睇眼仔，所以今之去覆診都好開心架！去到診所第一時間就見到小me啦！佢好鬼得意架，係一隻黑色嘅八哥仔，真係好開心可以見到佢同佢主人Peggy呀！佢地仲特登帶咗佢屋企一家四口嘅月曆咭俾我地，多謝晒！！

好在喺診所有小me陪吓，因為原本約咗２：４５pm而小me就喺阿Bo之前架，等吓等吓到三點先見周醫生落嚟，佢仲未食飯潻，因為聽到護士姐姐話醫生叫嘅多賣剛剛送到。又再等啦！咁等到３：４０pm終於到小me啦，之後３：５５pm就到阿Bo啦！　周醫生話老人家對眼都冇幾個月前睇得咁好啦，即係差咗囉！　都冇辦法，因為之前有事又因為年紀大退化，所以要多點留意佢對眼，有事就要即刻打電話話俾醫生聽，如果冇事就每月覆診一次，所以六月頭又會去覆診喇！希望下次唔使等咁耐啦，以前都未試過等咁耐架，阿Bo足足企咗成幾個鐘，好攰呀！由１：４５pm出發到５：００pm先返到屋企呢～中途阿Bo一如以往，未坐過！

攰到有咩大事發生都冇反應啦！要瞓返夠本致得啦！

咩係睇醫生三寶，就係水壺、零食同口罩囉，明天下午阿Bo要去太平道搵周醫生覆診呀，每次去睇醫生都一定要帶齊三寶架，上次帶漏咗口罩，搵晒成間診所都冇個合適嘅，阻咗周醫生好多時間呢！！

今次一定要記得帶先！

星期二同老人家剪毛，個脂肪瘤位置剪得太短，好顯眼潻～～

噚晚都冇報告到阿Bo嘅情況，因為佢由噚日中午一直瞓到晚上都未起身，所以都唔知佢實際係好返未囉！今朝佢落街終於有少少大便喇，由星期二開始佢都冇大便，可能痛到佢彎唔到身，所以今朝有都算係有進步啦！

佢亦比之前活躍咗，週圍行，自己去飲水食狗糧，星期三咩都唔食就嚇死人，今日好好多了，噚日又瞓足一日，但係醫生話要佢多休息最好鎖入籠喎（但係屋企冇籠架喎！），希望唔好再成日返風落雨啦，唔係老人家阿Bo又會背脊痛架喇！！

阿Bo個樣好迷茫，因為屋企有人執行李去旅行呀！每次佢見到ｄ行李喼就會好驚，因為佢知道又有幾日見唔到屋企其中嘅幾個人啦！我仲慘，要全天侯照顧呢位老人家！！

今朝早約咗周醫生十點，一早就要出門口，阿Bo今朝嘅情況比昨天還好了些，所以都冇咁擔心。醫生話佢對眼暫時都ｏｋ但係都依然要每個月覆診一次，下個月又要再去見周醫生喇！至於佢個背脊呢，呂醫生俾咗另外兩種藥，加入原本嘅藥一齊食，但我見佢今日好咗ｄ所以都唔唸住俾佢食住，再睇吓先～

每次睇完醫生都有一個後遺症，就係佢會好疲倦好眼瞓好辛苦，所以我噚日都好擔心佢又會整親自己，但現家都未知佢有冇事架，佢一返嚟就自己一枝箭咁走咗去瞓覺，今晚再話俾大家聽佢情況如何啦！！

今朝早阿Bo嘅情況依然係不太好，可能都係痛同冇力啦！所以我就繼續俾藥佢食，又要滴眼藥水，一早已經好繁忙，但冇辦法，希望佢食完藥會好返！

到下午大約四點就打電話返屋企問吓阿Bo嘅情況，點知佢地話阿Bo由今朝到下午一直未飲過水或者食過野，嚇得我要死因為我驚佢好似舊年十月第一次舊患復發唔食野唔飲水又發燒而引致脫水！！很不放心所以都係打電話問吓呂醫生如何是好，我本來都想明天睇完周醫生順便睇呂醫生，點知呂醫生明天放假，冇辦法。呂醫生話會請周醫生明天幫阿Bo檢查一下個背脊潻同時開定了一些更強效嘅藥等我地聽日去攞，真係麻煩晒喇！

到今晚返到嚟見到阿Bo嘅情況又冇佢地講咁差喎，佢有食飯又有飲水，都有四圍行不過都係唔穩陣，屋企個地又係柚木，所以好滑，點都好啦，佢有食野有飲水我都冇咁擔心，但係聽日要搭車舟車勞動我又驚佢整親，仲唸緊用咩方法或工具令佢可以係車度坐定定，好煩惱！！

今晚阿Bo嘅情況比昨天好了一點，身體可以平衡，但行路的姿勢還是很不自然，就住就住咁行，睇嚟都要多吃一兩天藥才可！佢半年內就有三之咁嘅情況出現，真令人憂心～～

而今晚阿Bo條尾都係直線向下 "point to the ground" 就知道佢仲未痛完，之後成個星期都落雨，又潮濕，都唔知點算喇！

今晚放工返到屋企見到阿Bo都有出嚟迎接我，但係行路時都係有少少搖吓搖吓，比今朝早好了些少。唔係太放心所以都係俾咗上次睇呂醫生配定嘅藥，如果一食就要食一個療程（三日），見到佢咁唔舒服都冇辦法啦！而見佢個樣都唔係咁精神，可能今日痛咗成日休息唔夠，希望佢食咗藥快ｄ唔痛啦！

呢個公仔係表姐送架，佢話似阿Bo所以就買喇！